Promié poul la kakayé, li-mèm la ponn zèf pouri !

Demoun i di : la Frans, sa péï la libèrté, l’égalité épi la fratèrnité. Solman, kan mi rogard koman lé shoz i éspas, moin na konm in doute sérié. Sé pou dir azot, moin la romarké na in pé dmoun i ézit pa pou amontr zot vré figuir, é la pa zoli !

Zistoman, mi sort lir kossa lariv dann in vil i apèl Argenteuil : la-ba, lo mèr la komine i èm pa bann SDF, li tash moiyin fé k’i oi pa banna an vil. Dèrnié zafèr li la trouvé, sé dmann bann zanployé la komine fane in spès poizon i apèl malador - sa in produi ropoussoir pou dmoun - dann lo bann landroi bann SDF i dor, sansa i trinn-trinn dan la zourné.

Bann zanployé la pa asèp fane lo zafèr, akoz i pi mové, inkroiyab ! I pik lo zié ! I donn mo d’kèr. Bravo bann zanployé la komine ! Sof ké la parti donn d’ot moun pou fané épi la fané. Dé-troi somèn diran, produi-la i sava santi lo diab, épi bann SDF i gingn arpa rézisté.

Pou moin, bann SDF i san pli bon k’lo mèr, pli bon k’bann rasis sosial akoz sé banna, dédan zot tèt, lé sal ! Promié poul la kakayé, li-mèm la ponn zèf pouri.

Justin