Oté

Promyé avril : poisson d’avril !

Justin / 1er avril 2020

JPEG - 43.6 ko

L’èr lé grav. Nou la rant an guèr é plito sis foi k’inn. La pandémi i fé tok-tok dosi nout port. Bann laboratoir l’apré fé lékours pou ramass lo milyon. Bann lanspèk lé an marsh pou anpèsh trouv in solisyon bon marshé-zot i vé sirtou pa ramass bann klopinète. Donk la pa lo zour pou plézanté.

Poitan sé in zour pou fé la plézantri mèm sak néna in gou amèr, sansa lé fade, sansa ankor néna mové gou. Mi sava pa rapèl tout la kouyonis i di dann radyo, ni dann bann gran zournal pars shak ané bann léspri kouyon i fé travaye zot matyèr griz pou fé ri sak n éna konm zot in vyé fon la kouyonis. I di pa la boush lé bète ? I di pa lo dan lé bète ? I di pa ni ri pou ninport kosa. Pou in riyin ditou nout misk zigomatik i tavaye pou nou rigolé.

Mi rapèl in zistoir mon momon téi rakont : in tour mon gran-mèr la fé mon gran-pèr. Mon gran-pèr lété i fé fonksyonn linspékyèr lékol é souvan défoi lo sèrvis l’instriksyon piblik té i anvoye ali an misyon pou oir koman lékol téi fonksyone dann bann zandroi in pé izolé dann lo gran sid.. é téi ariv ali pass la nuite déor é rant son kaz gran matin.

Donk in gran matin li ariv son kaz sin-zozèf papa bondyé é li la pankor arivé son madam-mon granmèr - i di ali néna in kab l’arivé i di aou mont vitman dan lé o d’sin-Lui pou fé in l’inspéksyon. Granpèr té fatigé, kafé li la pa gingn lo tan boir. Li la kol shomin é li la parti. Li la gingn lo tan marsh in bon boute mé mon gran-mèr la koup par santyé sansa pé sfèr l’anvoye marmaye an vitèss pou arète mon gran-pèr é pou dira li sinploman : « Romont la kaz ! Ou i rapèl pi nou lé promyé avril zordi ? »
I paré tout la ri mé mon granpèr Labor la ri moinské lé zot. Si zistoir lé vré, li lé vré. Si zistoir lé mantèr la pa moin l’otèr. Koton mayi i koul, rosh i flote !