Mwin la ziska antann in patron apré dir l’avé tro d’volontèr pou travaye promyé mé é mèm li té blizé rofiz in pé . Sirman sa té in patron dann boulanzri osinonsa in n’ot kalité lantropriz gouvèrnman i sort pran in dérogassion par rapor la fète travaye.

Sirman lé vré, mé si lé vré, kèl konklizyon i fo ni antir ? Sa i voudré dir pou bonpé travayèr promyé mé sa i kont mèm pa mé sa mi kroi pa…Sa i voudré dir bann travayèr la pa bézwin in zour d’ropo ? Mi kroi pa sa non pli kan i di bonpé travayèr lé pa tro lwin pou fé trap azot par lo burn-out.

Alor, kossa l’arivé ?

Bann travayèr i gnor promyé mé sé in konkète sossyal é sé la lite la amenn in zour konmsa sirman sa lé pa vré. ..Si mi kroi sak l’aprann lékol lontan é mèm zordi i fé pa in lansègnman la dsi é si wi koné pa listoir lo mouvman ouvriyé, si la konéssans lo bann lite lé pa aktivé dan la tète épi dan la mémoir lé pa étonan wi fé pi in kont konm k’i fo momandoné..

Kissa lé résponsab ? A tou lé kou lidéoloji dominante épi lo salèr tro fèb –si tèlman lo bidzé bann famiye lé touzour dsi la korde rède… avèk an pliss pou nou rényoné in vi touzour tro shèr é toultan an rogoumantassion .Pri léssans ?Pas solman : in sistèm ékonomik k’i rann la vi touzour tro shèr é lé pa fini d’grinpé..

Talèr v’ariv vin déssanm é i fodra travaye pou zoinn konm i di lé dé boute par lo milyé.

A bon antandèr salu !

Justin