Mon bann kamarad, sak i fé lo ron dovan la boutik, i konpran pi amoin. Zot i di komansa, akoz Justin lé rousté li ? Akoz li lé an ké d’bèf konmsa ? In moush i poz pa d’si. Zot i di, talèr sa va mor avèk in kou d’san. Apré son l’am, v’alé trakas bann moun vivan vik son lèr té pankor arivé.

A bon, zot i trouv drol akoz moin lé an kolèr ! Tou lé zour, mi ramas dann boit o lèt in propagann bann kandida, kisoi pou zéléksion lo mèr, kisoi pou konsèy zénéral, anmayé avèk in bann piblisité i invit aou ashté sak ou la pa bézoin, avèk larzan ou la poin. La pa tan la piblisité i fé mont mon gaz, mé plito lo propagann. Akoz kan mi pran la pèn lir, mi oi pa arien lé bon pou moin, pou lé z’ot, pou bann ti-kolon, an zénéral.

La pa zot i trok lo mo ! Non, bann mo lé dann diksionèr, mé sak zot i di lé vag, sa i koz pa avèk moin pèrsonèl, i anparl pa tout tablatir nou lé riskab ète dédan sirtou koman kal sa.Alors, kan nou sar dann inn ponp, koman nou va sort la-dan ? Koman sirtou nout zanfan va sort la-dan ? Poitan lé sir, nout zanfan v’arèst dan la kaz nou va fé, dsu la tèr nou va léssé.

Justin