Nana lontan i diskite pou diminyé bann l’émisyon lo gaz i fé léfé d’sèr. Nana lontan k’i diskite, mé la pankor trouv in bon z’akor… sof ké in bonpé péi la di, zot i sava fé l’éfor sèryé épi zot la fiks par zot mèm in kantité dyoksid karbone pou zot pa dépasé. Bann z’ansien i di, in promès sé in dète, mé souvan dé foi, la parol i kol pa avèk lo z’ès. Désèrtin promès, sé promès soular, i fo pa fyé dési !

Mi sort lir dann in zournal konm de koi l’ané 2010, la émète in gran kantité dyoksid karbone, in gaz i fé léfé d’sèr. Plis ké l’ané 2008, sink pou san anplis in l’ané la bate rokor. Na in pé i komans di, la rogoumantsyon dé dégré la tanpératir pou l’ané 2100, sa i gingn-ar pa fé. Pli pir, si i kontinyé konm sa, lé riskab mèm dépas kat dégré la rogoumantasyon. Kan i di sa konmsa, na l’èr d’rien, mé kan i mazine lo bann konsékans, l’èr-la, san égzazéré, lé danzéré pou l’imanité.

Sanm pou moin, na in pé i di dann zot fonnkèr : kosa li koné Justin ? Ousa li tir sa ? Li pran ali pou Bondyé don ? Non ! La pa késtyonn sa ! Mé Bondyé la pa défann anou rode la vérité, la konsékans la foli d’moun. É na d’moun saz, épi savan i étidyé épi i asplik anou la konsékans sak ni fé dési la tèr. Nou ? Bann gro vaza, mé galman bann ti-kolon, pars la résponsabilité, sé sète tout demoun. In résponsabilité pou nout tout.

 Justin