Moin la romark in n’afèr dann gouvèrnman la France i étone amoin zour-an-zour : sé son kapasité dir in n’afèr épi fé lo kontrèr san jène ali... sansa li aplik in projé li la bate tanbour dsi, in manyèr ou i atann pa. In l’ébzanp ? Inn mèm, mé l’ébzanp nana in ta avèk in paké, pars li fé konmsa dépi li lé o pouvoir. Donk... Li di konmsa li vé lite kont bann z’inégalité, li vé pass in kal bann privilèz.
Dan la tète bann ti-kolon, sa i vé dir li sava fé pèye plis l’inpo sak i manz z’ot yaourt avèk in kiyèr an or, bann moun la ote par l’fète. Mé lé pa sa, pars bann vré rish, li toush pa zot... an kontrèr, li protèz azot avèk lo boukliyé fiskal. Bin alor, ousa li sa trouv so bann privilèz-la ? Bin, li sa trouv sa an parmi bann travayèr la gingn laksidan travay, pars zot i pèy pa z’inpo déssi larzan la sékirité, zistoman, pars zot la gingn in laksidan travay, alé oir sak lé malade, épi bann madam an konzé matèrnité i pèy. Zot i kriy : "Inzistis !". Donkalor, bann dépité la déside l’ané proshène, zot va pèy l’inpo, é pou zot, ala in l’inzistis réparé.
Na oir kossa lo Séna va désidé... Touléka, si li sava rode bann z’afèr konmsa, li la pankor fini, pars bann ti mézir pou soulaz in pé la soufrans bann viktime nana in bon pé, donk noré in bon pé pou siprimé, provik i toush pa bann vré privilèz bann gro vaza.

Justin

L’ésplikasyon inn-dé pti mo :

Pass in kal : oté ti pass kal, Pascal lé mor ! (gro l’éspri kréol)

Bate tanbour : fé konète partou !

Soulaz : diminyé la doulèr san fé passé

In ta èk in paké : in takon, in bon pé, in sharjman, in tonn...

In pti pé : in pti zing, in mizing, in pti guine, in zyèk...

In vaza : in moun la ote, in moun rish, in bwana