Zot i koné lé pa touzour possib bien ésplike son ka, kissoi dann in ladministrassion, kissoi dovan in tribinal, kissoi kan wi sava l’armé : néna dé kou, wi panss ou la bien ésplike oute ka épi wi apèrssoi ké ou la pa sitèlman bien ésplikéké sa. Défoi wi panik in pé pars ou néna dan l’idé oute prop kozman la fé foute aou d’dan...

Mi diré galman la pa touzour fassil pou in lanploiyé d’ésplike in ladministré késhoz souvan défoi délika, difissil, avèk in kantité règloman in tète-fromaz lo ministèr laba dann Paris la fagote éspésyalman pou roul aou dann la farine.

Mi rapèl in zour in moune mi koné té apré pass pèrmi é lo linspéktèr la di ali « réduir l’alur » donk li la « rédi » é aprésa li té étoné lo légzaminatèr la pa done ali son préssyé Sézam sinploman pars li la konfonde aksélèr avèk ralantir. Mé d’apré zot konbien kan i ariv in lanploiyé frankofone épi in kliyan kréolofone i konpran pa inn é l’ote si tèlman olèrk fassilite la vi dé z’inn é dé z’ote, i konplike ankor in pé pliss lé shoz.

Donk mi konpran bien i fo diminyé la distanss rante inn é l’ote lo kozman lé z’inn avèk lo kozman lé z’ot, lo pèrsonèl k’i akèye épi lo ladministré. Mé si mi di sa sé in problème zénéral é sé problèm-la ki doizète réglé lo méyèr fasson k’i fo mwin lé kaziman sir in pé va dir : i fo arète pran lo kréol pou in moune i koné pa arien, alé oir li la parti lékol dopi étan pti ziskakan li la vni gran.

Mé in pé i pé di, la pa in n’afèr d’franssé épi in n’afèr d’kréol, pli sinploman sé in dékalaz rante lo nivo la formassion dé z’inn épi lo n ivo la formassion dé z’ot mé kozman-la i vo pa san pour san sa ! Pars si sé in mo ték nik ok, mé si sé in tournir d’fraz sinp k’inn i manyé bien épi l’ote lé dir pou manyé, ébin l’èr-la i fo trouv in moiyin pou inn amélyor son kon prenur é l’ote so n manyèr fé konprande ali.

Sa i ariv toulézour é mwin pèrsonèl mi panss si nou néna lo moiyin fé konprande sansa éspliké an kréol épi an franssé mi panss nou pé fé progré dann la kominikassion lé z’inn avèk lé zot.

A bon ékoutèr, salu.

Nb toussa an panssan bande zakor lofis la lang i sign avèk bande zaktèr piblik. Ofiramézir ni antrevoi in pé pliss lo féklèr pou nout lang kréol rényoné.

Justin