Ala in bon kozman mi èm bien : kozman demoun la pa présé, kozmann moun i amenn la vi an métode. A gard zoizo, li amenn brin par brin, zèrb par zèrb, paye par paye épizapré li fé in zoli pti ni. Zoli ? Biensir lé zoli, zoli konm lo ni bèk roz, zoli konm lo ni bélyé épi d’ot zoizo ankor. Ou lé ziska a domandé koman bann zoizo i gingn l’idé pou fé zoli zafèr konmsa. L’instin ? Pétète. mé sak lé vré pou zoizo lé vré pou l’moun pa dsi la késtyonnn l’instin, mé dsi la késtyonn métod : i fo amenn lo prozé poin par poin, pa an fou fou, pa an gouté largé, tèl fason ou lé sir ou i ariv o bi. Alé ! Mi lèss azot réfléshi la dsi é ni artrouv pli d’van sipétadyé.