Air austral I sort ashté dé l’aviyon : dé pou lo pri d’inn ! In bone afèr mi pé dir azot ! Na poin plu meuyeur ksa ? I sort ashté dé Boïng 787. Sa lé vayan pou d’bon ! Vayan konm lé dé konpèr l’ashté : mésyé Didier é mésyé Malé… In pé i di mésyé Malé sé lo shoval de Troie pou Air-France. I di mé moin mi koné : la pa tout sak i di lé vré ! La pa tout sak i di lé pa vré non pli ! Tan k’à mésyé Didier, in pé i prétan ké li sar kontan kan li n’ora fine fini avèk Air Austral pars i prétan sa lé né avan ké li ariv La région. Vré ? Pa vré ? Kont dsi la vi pou éklèr a nou firamézir.

I parétré, mé alé oir si lé vré !

- Lo 777 nana 500 plas é avèk sa li té plin toultan.

- Lo 787 nana 260 plas donk li lé riskab ète plin ziska la guèl é lès la plas pou bann konkiran, air-France dann ta. Arzout èk sa lo 787 lé pli lour ké lé z’ot konkiran, li sar moin loin. Kansa in l’aviyon pou alé An Frans é k’i pozré madégaskar, mayotte, Dzibouti, lo Caire, Casablanca avann trap Pari. In sakré karé pou rapèl amoin mon vin-t’an . Akoz pa tir lo Constellation dann son mizé ?

Moin la lir osi tazantan son motèr i gingn la pépi é li vé pi marshé. Rozman in motèr l’asé pou anparé. Mé si lé dé i désid fé l’intérésan an mèm tan ? Sé la fote pa d’shans. O fèt mi sort antann lo gouvèrnman fédéral la domann boïng in shanjman d’irzans dsi lol’aviyo 787. Mé pétète pa d’si sète la poz La Rényon nana dé-troi zour. I fo kant mèm arète tir lo pou dan la tète la poin shové !

Zot i koné kosa sa i rapèl amoin ? Sa i rapèl amoin kan mésyé Didié la parti négosyé Matignon 2. Promyé minis La frans, dann tan-la, mésyé Fillon kan li la vi lo bann vérou Paul Vergès l’avé mète apré soté la di avèk mésyé Didier : ou in moun for ou ! In moun dir dann la négosyasion ! Fransh vérité li la pa tronpé.

Astèr Pti l’avion volé nou va désann an parashut-in shanson karnaval sa ! Inkyète pa.