Demoun va di kosa l’ariv ankor justin ? Pli loin k’li la parti sé Silaos, ankor, in foi. Ala, konm ki diré, li mète son kiyèr sal dann marmite i kui pa pou li. Ala, li sèy may avèk bann problèm "internationaux". Ankor, kèl péi i inkiète ali zordi ? Bann zéta z’ini l’Amérik. Kosa l’ariv la-ba don ?

Péi-la lé an difikilté, dann l’Irak, dann l’Afghanistan ? La pa sa. Sa in n’afèr li n’a labitid : Vietnam la-ba, li la kour kilot dan la min, li la larg tout an plas. Alor pét’èt, son biyé vèr, son dollar, la valèr i dégrènn par raport l’ero ? A non ! Kontrèr, sa in bon zafèr pou li ! Pou son komèrs, pou son lindistri, pou son l’agrikiltir.

Bin alor, kèl gran traka l’ariv ali ? I mète son l’opignon piblik an shalèr, i inkièt ziska Justin, issi dann l’oséan indien ? M’a di azot tout suit : sak i trakas azot, bann lamérik, sé dékolté madame Clinton. Li lé si tèlman gran kèr, si tèlman li lès demoun tir kornèr. Oté, lé ga ! Lamérik lé boulvèrsé.

Oui, ala lo problèm ! Ala pou kossa justin, tansion la monté ! Bann z’ansien té i di : « pti zanfan, pti traka ; gran zanfan, gran traka ». Justin, pou son par i di : « Pti péi, pti problèm, gran-gran péi, gran-gran problèm ! » - Éya, bondié !

Justin