Kriké Méssyé ! Kraké Madame ! La klé dann mon posh, la taye dann oute sak !

Ptizan i sèye sov ali an montan dsi shoval, mé momandoné shoval i di ali dsann pars sitrouye-la sé Grandyab li mèm é shoval i pran la pèr. Rozman lo pti marmaye i trouv in léléfan é li di : Léléfan, lélélfan, porte amwin dsi oute do pars sitrouye i vé kraz amwin. Léléfan i di ali monte ! Mé firamézir sitrouye i grossi, épi i roul plizanpli vité é i arète pa répété :

« Ou la kass amwin, ou va porte amwin ! Ou la kass amwin, ou va porte amwin ! »

Momandoné Léléfan ossi i komanss paniké épi li di Ptizan : « Aou ! sorte aou dsi mon do ! Sa lo dyab lé dann sitrouye-la ! ». Ptizan i sote atèr é lo sitrouye i koush déyèr li.. Momandoné son marène la Fé, i oi li lé pèrdi. Alor i di ali, kour diréksyon lo pon. Kashyète aou bien é ou va oir kossa v’arivé.

Ptizan i boure lo fèr épi i ariv koté lo pon, in pti rivyère i koul an dsou. Sitrouye i roule dsi li pou kraze ali. Ptizan i bèss atèr é lo sitrouye i sote par dsi la ranpe lo pon épi i tonbe dann fon, i klate dann lo an mil morsso. Fini ! Grandyab lé mor é bien mor so kou issi. Mor é bien mor ?

La pa sir ditou, pars dann lo, landroi lo sitrouye la klaté, in kantité pti poisson rouz i toubiyone dann bassni. Ptizan la konm anvi souke inn. Sa marène dann syèl i dovine kossa i sava arivé é i di ali : « Ptizan, kol pa pti poisson-la, sa lé danzéré ! »

Kriké Méssyé ! kraké Madam ! L’avé inn foi pou inn bone foi méssyé lo foi la manze son foi èk in grinnsèl.

Mi koné pa kossa i sava arivé, mé konm mi koné Ptizan sa i étoneré pa mwin ké li sèye pa trape in poisson. Anfin, nou va oir proshène foi-lindi si zot i vé bien.

Sétyèm morsso lé fini-uityèm i sava komanss son tour.