Oté
Ptizan, Grandyab é lo panyé mazik - sizyèm morsso
Zistoir pou rakonte dsi galé
/ 23 zwiyé 2021
Dèrnyé foi nou la vi koman ptizan la fé on panyé mazik é koman li la gingn tranporte avèk li in mèle la pyèr an-o mèm dann syèl é koman avèk sa li la anfonss grandyab dan la tère ; mé antansyn, Grandyab konm zot i koné sa lé imortèl é sé konmsa ké landroi la antère ali la pouss i gayar pyé sitrouye é nou va oir koman lo pyé sitrouye li nmèm lé kaziman dyabolik.
Dèrnyé foi nou la vi koman ptizan la fé on panyé mazik é koman li la gingn tranporte avèk li in mèle la pyèr an-o mèm dann syèl é koman avèk sa li la anfonss grandyab dan la tère ; mé antansyn, Grandyab konm zot i koné sa lé imortèl é sé konmsa ké landroi la antère ali la pouss i gayar pyé sitrouye é nou va oir koman lo pyé sitrouye li nmèm lé kaziman dyabolik.
Kriké Méssyé ! kraké Madame ! La klé dann mon posh ! La taye dann oute sak !
Ptizan la anvi, anvi mèm, kass in sitrouye dsi lo pyé la poussé. Li kass lo zafère épi li mète sa dann in sak a do trèssé épi li marsh, li marsh diréksyon son kaze. Mé dann son do sitrouye i mète a kozé épi i grossi même é opliss li koz, opliss li grossi. Momandoné Ptizan i déside mète lo sitrouye atèr. Li marsh sitrouye i marsh déyèr li, li kour é sitrouye i kour déyèr li.
Ala k’i di : « Twé la kass amwin, twé va porte amwi ! twé la kass amwin, twé va porte amwin !
Ala sitrouye la fini vni bèl konm in pti koshon, épi in moiyin, talèr in gro. Ptizan i kour mèm pars li la père sitrouye i kraz ali.. Dann shomin li trouv shoval, é li di : « shoval, shoval, sitrouye i rode kraze amwin, porte amwin dsi oute do. Shoval i di : « Monte aou ! ». Mé sitrouye i kour déyèr shoval. Shoval i kour ! Sitrouy i koze mèm, li di :
« Twé la kass amwin twé va porte amwin ! Twé la kass amwin, twé va porte amwin ! »
Shoval i pran la père é li di : « Ptizan déssande aou ! sitrouye-la sa dyab sa ! sorte aou dsi mon do ! ». Ptizan i sote atèr. Li lé dann danzé ! Gran, gran, gran danzé !
Kriké Méssyé ! Kraké Madame ! L’avé inn foi pou inn bone foi Méssyé lo foi la manze son foi èk in grinnsèl !
Rozman pou li, li trouv léléfan.
Sisyème morsso la fini-sètyème morso lé pou tanto.
