Ptizan, Grandyab, lo panyé mazik - katriyèm morsso

Ptizan la fini trèss son panyé : in gayar panyé, bien solide épi bien komode kaziman in véikil pou navig dann l’èr. Li domande Grandyab si li vé éssaye son panyé, mé lo dyab, kourazé mé pa témérère, i rofiz pars li la père nofrazé. Mé Ptizan néna konfyanss son panyé é li di li va éssèye par li mèm. Ala lo pti marmaye i rante dann panyé ! ala li sava navig dan lé z’èr.

Kriké ! Kraké ! La klé dan mon posh ! La taye dan oute sak !

Ala Ptizan dann panyé é li komanss shanté : « Pti panyé monté ! Pti panyé monté ! ». Lo panyé i bouze-bouze an plass é oila li komanss monte dan lé z’èr. Pa tro vite, pa tro dousman, li pran la otèr. Li monte la otèr pyé d’mang é mèm pli o.

Lo dyab atèr i komans rash son shové é li kriye-plère an mèm tan : « Ala mon manzé parti dan lé z’èr ! Ala mon kari parti, fouti pou mwin ! ». Mé Ptizan i komande son panyé é momandoné li di : « Pti panyé déssannn ! Pti panyé déssande ! lo panyé i déssande épi i poz a tèr, landroi li sorte koté grandyab épi li di : « Grandyab, ! ou la vi mon panyé monté déssande, astèr sé a ou d’rante in kou d’dan. Grandyab la pèr, mé li aksèpe é Lo pti marmaye i komande lo panyé.li di :

« Pti panyé monté ! Pti panyé monté ! Pti panyé i monte, i monte mèm. Grandyab i plère avèk la pèr éi kriye : « Fé dsande amwin siouplé ! Fé dsande amwin siouplé ! Mi rèss pa la-dan, mi rèss pa la-dan. Pti zan i komande son panyé pou déssande é o panyé i déssande.

Kriké ! Kraké ! kriké Méssyé ! kraké Madame ! l’avé inn foi pou inn bone foi méssyé lo foi la manz son foi èke in grinnsèl.

Ptizan i di avèk lo dyab : « Alon fé in paryaz ! alon paryé mon panyé, pti konm li lé i gingn amenn dan lé z’èr aou Grandyab, amwin Ptizan épi gran rou la pyèr moulin mayi lé atèr-la. Alon paryé ! »

Lo dyab i réponde : « Kossa ! amwin rante ankor in kou ladan ! Mèm a oir mon momon jenn fiy mi rante pi ladan. Konte pa dsi moin. Alé robate oute karé si wi vé ! kouyon èk mwin i fé dé ! »

Katriyème morsso lé fini-a domin sinkyèm morsso.