Mézami, kozman-la i sorte dann in péi i apèl Burkinafasso, in lansien koloni fransèz dann l’afrik dé l’ouèst,, la patri in gran révolisyonèr téi apèl Sangara la parti tro bonèr vi k’in pé l’assassine ali. Kozman-la i rapèl amwin in n’ot provèrb téi di konmsa : « Si ou lé trayi souvan dé foi, sé par in moun lé prosh de ou. ». Sa i rapèl amwin César lété viktime in konplo son garson adoptif la tranp dodan é lo boug linstan sa mor la di sinploman : « Aou ossi mon fiss ! », aprésa li la pouss son dèrnyé soupir. Zot i koné dann la politik sé oute bann mèm k’i trayi aou. Zot i koné galman la pa in blan la trayi bann révolté Sin-Lé, l’ané 1811, mé in zésklav téi apèl figaro.. Mi koné in fraz sélèbe i d konmsa : « Père protèz amwin par raport mon bann zami, mi okip mon zènmi ! ». Alé ! Mi kite azot rofléshi la dsi é ni artrouv pli d’van. Sipétadyé.