Mézami kozman mwin la marke an-o la mi panss sa in provèrb l’Afrik. Pou lo sanss prop li mérite in diskissyon, mé koméla dsi linternet i gingn vérifyé toussala : déssèrtin pyé d’boi i bataye pou pran zot plass dsi la tèr, mé d’ote i akorde inn avèk l’ote, mèm i donn la min inn-a-l’ot. Pou la rassine lé parèye galman : souvan défoi zot lé braté dsou la tère san k’wi koné. Astèr si ni rogard l’afèr par raporte la sosyété : déssèrtènn foi demoun i fé sanblan zot i antan pa dovan l’moun, mé zot i antan an éryèr. An touléka sé sak demoun i panss : i antan pa La Rényon i antan kan lé dann Paris, i antan pa dan lo péi mé i antan pou alé tyé zanimo Madégaskar. Sirman sak bann ti-kolon i di kan zot i anparl band gro vaza. Boudikonte mi kroi sa i dépand lo mond pars kan i di dë pèrsone i manz pa in grinn sèl ansanb, si mi baze dsi mon band konéssans, d’apré mwin sa lé vré. Antouléka, sé in kozman i mérite la rofléksyon, pèze lo pour, pèze lo konte, fé in koli anvoyé. Alé ! ni artrouv pli d’van. Sipétadyé.