Médam, zé Méssyé, la sosyété, koze èk mwin sé koze èk in kouyon mé sé o pyé d’lo mir k’i oi lo vré masson. Mézami, kozman mwin la mark an-o la, sa i fé parti bann kozman mi yèm pa pars sa i amenn amwin porte in rogar an grenn dsi l’imanité. Fransh vérité, kan mi lir sa, mi oi l’imanité konm mi yèmré pa k’èl lé : égoïste, profitèr, san pityé ; é mi domand amwin si sé l’imanité ké lé konmsa sansa sé mwin k’i oi li konmsa tazantan suivan mon zimèr. Pars in zour wi oi lé shoz an roz, in zour wi oi lé shoz an noir suivan lo band pansé néna dann mon tète. Pars si sak mwin la di an-o-la lé vré tazantan, tazantan lé pa vré, sansa lé vré épi pa vré an mèm tan. Lé dir panss dé shoz konmsa dann in péi épi in sosyété parétil néna l’antante-zot i koné lo viv ansanm. Mé zot i koné l’antante sa i sava, sa i vien, san ké wi koné vréman pou kossa. Sé pou sa, mi kite azot rofléshi par zot mèm la dsi é ni artrouv pli d’van. Sipétadyé