Zot i koné néna désèrtin pyé d’boi i pous droit konmsi zot i vé trap lo syèl, mé pa tout. Pars in pé i pous tort-alé rode pou kosa , moin mi koné pa. Mé biensir, vi k’sé in provèrd nou na poin arien pou fé avèk lo sans prop, sans figiré i intérèss anou plis. Alor kosa bann zansien téi vé dir kan zot téi di sa ? Ni konpran bien zot l’apré anparl lédikasyon bann zanfan. Néna sak i grandi bien, néna bon prinsip épi bone valèr épi néna sak néna plis lo vis ké l’izine Bofon. Zot léspri lé torsadé, zot néna plin mazinasyon an bète dann zot tète. Fèr azot konfyans ? Domyé pa pèrd son tan. Mé, fransh vérité, zot i pans pa i fo fé konfyans dan l’om ? Moin pèrsonèlman mi kroi mé i fo ou i koné lo tik-tak, i fo ou néna lo moiyin pou moiyéné, pars an ka kontrèr ou lé riskab pète atèr : lèr ou i kroi ou i pé fé konfyans dan l’om ou i tonb dsi in moun i roul aou dann la farine. Alé ! Mi kite azot rofléshi la dsi, é ni artrouv pli d’van. Sipétadyé !