Oté

Pyé doné, shoval monté !

Témoignages.re / 17 avril 2018

JPEG - 43.6 ko

Zot i koné in n’afèr, mi sort lir dann in rézo sosyal, gouvèrnman i vé mète in dézyèm zourné po travaye san péyé. Oui, mé zami, san péyé... San ké lo travayèr i toush son larzan é lo patron i arvèrs lo larzan l’éta… L’avé déza inn : zot i rapèl lindi d’pannkote é bin so kou isi lé riskab an avoir dë. Akoz pa troi, akoz pa kat.

Dann in n’afèr konmsa gouvèrnman i pé gingn lo gou é sak la désid sa an promyé, li pé pa mazine sak i pé ariv apré. Sa i fé pans amoin so zafèr k’in sèrtin Michèl Roccard l’avé majiné pou ranplas in pé bann kotizasyon sosyal. Sa i apèl la CSG avèk lo inpozab épi lo non inpozab, avèk in poisantaz pou sak i travaye épi inn pou sak lé. Zordi ni oi bien sak i éspas : sé lo to k’oi ogmant avèk konm promès domin sé lo taks dabitasyon va bésé, pétète mèm xa siprimé.

Kroiyé moi épi fouté vou d’dan : la guèr sa lété pa prévi é la guèr sa i kout shèr. I kout shèr fé lo pti kok bataye dann moiyin oryan é pi zot i koné mète lo doi dann l’angrénaz é sélo bra lé riskab pasé. Donk pou rovnir dsi bann zour travayé épi pa péyé mi trouv lé bien fasil armète in pti dsi é konm moin la di an-o la akoz pa plis. Akoz pa alarzi ankor lo baz inpozab é zot va oir ké inn dan l’ot, lo famé bès z’inpo va fini par ète in goumantasyon. Konm di lo kozman : « Pyé doné shoval monté ! » é sa sé in n’afèr dann la vi piblik épi privé sa sé in n’afèr ni koné bien.