Souvan dé foi, bann proverb I mète an sène bann demoun, sansa bann zanimo, sansa ankor d’ot zafèr. So kou isi, proverb shinoi-la i mète an sène in ash avèk in pyé d’boi, dann in sénaryo ni pé apèl sa « dramatik ». Pars zot i koné bien kèl travaye lo ash i fé avèk pyé d’boi. I di pa ti ash i koup gro boi ? Finalman, lo ash i fé port lo tor dsi lo pyé d’boi li mèm-viktime épi résponsab ! Dizon, kaziman ash lé movèz foi : bone foi, movèz foi, bann kozman I zoué souvan avèk sa. Lé normal pars la sosyété lé konmsa, in mélanz lé dé konm zot la sirman romark ali dopi ni anparl de sa. Alé ! Mi kite azot rofléshi la dsi é ni artrouv pli d’van. Sipétadyé !