(page 16)

Dimans pasé, la sélèb lo 20ème anivèrsèr kan lo gouvèrnman fransé la fé pété lo “Rainbow Warrior”, in bato Greenpeace té milite koté la Polinézi kont bann zéksplozion atomik la Frans té i fé.
Na 20 an dsa, Paris la zir partou té pa gouvèrnman fransé lotèr. An s’tan là, Mitterrand té prézidan.

Dimans pasé, zournal “Le Monde” la publi in rapor avril 1986, ousa bann sèrvis sekré fransé i rokonèt sé lo gouvèrnman la done azot lord ataké. É Mitterrand lété dakor. É Chirac, promié minis, la koni so rapor ousa té marké la fot i rovyin byin la Frans, mé li la tyinbo sa byin séré.

Zordi kosa ni pé dir ? Daborinn, ni konsidèr l’atak “Rainbow Warrior” sé in latak térorist, sé d’térorism d’Éta pou défann in koz inposib kan nou koné lo déga la fé si domoun é si la natir. Na in fotograf lé mor si lo bato, ziska zordi na poin pèrsone la domann son fi pardon. Dé, koman gard konfians désèrtin politikèr fransé apré in foutan parèy ? Troi : kosa nou attann pou ziz sak lé rèsponsab latak lo “Rainbow Warrior” ?

Zistin