Oté

« Rakonte pa out malèr lé z’ot : papang i atake volaye bléssé »

In kozman pou la route

Justin / 17 mars 2021

JPEG - 43.6 ko

Médame zé Méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami, provèrb-la i sorte Maghreb, mé konm mi di souvan mwin la kréoliz ali in pé. La pa pou sa sé inn kozman La Rényon, mé pétète domin li va vni inn. An touléka, li néna in bon losson d’moral, pars kossa i ansèrv souplègn toultan, rakonte out mizèr, fé pityé, dir toute out malèr ? Pou d’moun intérèss azot out sor ? Kroi pa tro. Pou noute provèrb si wi fé sa, bann profitèr va abiz dsi ou. Soidizan pou ède aou, an réalité pou abizé. Mwin néna konm filozofi pa rakonte in n’afèr d’mal l’ariv amwin sof pou plézanté. Pou koué ? Pars mi vé pa pass pou in moun fèb - in privilèj pou l’moun fèb sa !- fé tèl fasson k’demoun i panss pa si ou lé fèb. In bon filozofi non ? Antouléka mi kite azot rofléshi la dsi é ni artrouv pli d’van. Sipétadyé.