Médam, Mésyé, La Sosyété, koz èk moin sé koz avèk in kouyon, mé sé o pyé d’lo mir i oi lo mason. Zot i koné, fitintan, demoun demounLa Rényon lété mizèr pou vréman.I di galman zot té i ral dsi l’gongon d’soufrans. Pou kosa i di sa ? Pars dann tan mi di azot, lo dèrnyé dé dèrnyé dann la sosyété rényonèz lété bann alèr d’piosh… Biensir l’avé in pé téi ranpli bien zot boujaron mé néna d’ot non é anplis ké sa, lo vèr téi manz azot par anndan. Mé zami la pa bézoin pène an roz lo tan d’lontan, pars lo tan d’lontan lété pa roz tou lé zour. Mi an souvien mèm désèrtin marmaye lékol téi gingn kriz de vèr an arivan lékol, désèrtin zanfan téi gingn féblèss dsi lo ban katéshis. Mèrsi ankor si la diréktris sansa si mésyé mon pèr l’avé in vèr lo d’sèl pou done azot avèk in gazon d’ri fré sansa in gazon mayi. Mèm tèl ke sé lété kant mèm myé ké arien ditou. Alé ! Mi kite azot rofléshi la dsi é ni artrouv pli d’van. Sipétadyé.
NB-Zordi dsi la tèr néna plizyèr santène mil pèrsone i soufèr la fain é sa sé in n’afèr ni doi pa obliyé . Ni doi pa obliy non pli kisa l’otèr d’in katastrof konmsa mé nou va anparl de sa inn sé zour.