L’il Rodrig ? Mi pans zot i koné l’il-la ? Sa lé konpri dann téritoir morisien, mé li na son l’otonomi avèk son minis épi son l’asanblé réjyonal. Rodrig, sa la pa tro gran : in larzèr uit kilomèt dsi in longèr dizuit kilomèt. Mé na in afèr éstra laba, sé son lagon : plis dé foi la sirfas l’il Rodrig par li mèm... L’il lé pa sirpéplé pou vréman, mé i komans an avoir in bon pti pé d’moun. Arzout èk sa, konm partou i fo protèz l’anvironman, é lo gouvèrnman i fé sak li pé, é konm d’abitid, in pé i di li fé bien, d’ot non.

In l’égzanp ? Laba na in foré i apèl Solitid. Dann foré-la, momandoné demoun la plant in pyé d’boi i apèl Mahogany, in zanr l’akajou, in boi présyé si zot i vé. Li lé an danzé, donk in l’institisyon intèrnasyonal la désid défann vann boi-la. Donk i fo protèz ali. Mé désèrtin défansèr l’anvironman i pans li boir tro d’lo, nèf san lit par pyé d’boi, é konm Rodrig na in problèm dolo, la désid koup kat san vinn sink golèt karé (1 ha), in foré la fine trap son san t’an, i fo dé pèrsone min dan la min pou fé lo tour in pyé d’boi… sé dir si bann pyé d’boi-la lé bèl. Promyé késtion : kosa va plant a la plas ? Va plant bann pyé d’boi i pous natirèlman dan l’androi, bann pyé d’boi indijène par rapor l’androi. Kosa va fé avèk lo boi ? Bann résponsab la vann é la ashté rant zot. Sak lé kont i di la poin lo droi vann, é anplis ké sa zot i di pou kosa toulmoun la pa gingn lo droi ashté in bout. Konm par in tiraz o sor ! Wati-watia, l’afèr i komans shofé, é in pé i di zot va port plint pars lo mèm dimoun, désidé pou koupé, koupé, vandé, ashté. Sak lé akizé i di zot osi va port plint. Afèr pou suiv !

Dan in l’androi i apèl La Plènn koray, in l’androi sèk, la désid ramas lo la plui. Gouvèrnman la désid èd ui san famiy pou fé sa. Shakinn i gingn dé sitèrn dé mèt kib pou anpar d’lo la plui kan i tonm dsi zot kaz. In pé i kritik pars sanm pou zot, sa i fé pa in bonpé d’lo. Moin pèrsonèl mi pans i vo myé sa ké arien, sirtou ké lo gouvèrnman la désid firamézir dévlop so koléktaj lo d’plui... Myé vo sa ké riyin pars dann sèrtin kartyé, i gingn dolo in foi tou lé moi. Donk nana pou fèr !

Akoz mi parl de sa ? Pars isi, dann désèrtin l’androi, nou na problèm dolo galman, mé shak foi la plui i tonm, ni jèt in kantité i sort lo toi la kaz, i sort lo toi l’imèb, i koul dann ravine, i sava zèt son kor dan la mèr. Boudikont, nou osi ni dovré fé in bon zès pou ramas lo la plui, kisoi pou aroz zardin, kisoi pou dolo kabiné, kisoi ankor pou d’ot z’izaz ké boir d’lo dirèktoman ; Mi pans sa noré soulaz in pé nout posh ; kan mèm pa bokou, in pti morso !

Justin