Matant Zélida la ékrir justin :

Mon shèr nové, mon spès salté, rouj-de-fon dovant l’étèrnité, mi domann amoin bien akoz zot i vé rolèv lo mor toultan. Mi oi zot, bann rouj-de-fon konm demoun lo zyé lé déviré an aryèr. Akoz zot i fé pa konm la modèrnité i komann : zot té i vé in n’afèr, la vi la pa doné ébin pass a ot-shoz. Mi vé anparl lo tram-train : zot la pa gagné, lo pèp la vot kont ébin pas l’éponj dsi l’ardoiz-la. Aprop in pé z’ot majinasyon. La pa bézoin grongné, grongné, grongn dann vid konmsa. Tout fason, si zot la pa kontan, pran konstan. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, moin lé pa fdakor avèk ou san paour san. Kosa zot i kroi dann lo préféktir, Kosa zot i kroi dann konsèy réjyonal ? Zot i pans kréol la tyé kouyon pou pran son plas ? Lo rosh la tonbé, sa lé vré mé si l’avé ashèv lo tram-rtrain dopi 2013 noré té fini é konmsa o moins kréol nora gingn lo train pou roul dodan é moins traka dsi si la rout… In n’ot afèr mi sort lir dann zournal lo débouli i tonm a « pig » : a pig pou lo préfé oblij demoun aksèp lo bann karyèr ! apig pou konsèy réjyonal fé son piblisité dann télé ! A pig pou dir sak i vé pas o rout-la lé kont l’intéré La Rényon. Asé ramas mantèr avèk kréol don ! Ramas mantèr la pa bon. Tok ! Pran sa pou ou !