Souvan-défoi demoun i di, la vérité va nyabou fé son shomin. Sa lé byin vré, mé bann mantèr i baz pa déssi domin, sansa apré-domin, zot i baz déssi zordi. Zot lé kalifyé dann la mansonzri, é zot i koné, oplis in mansonz lé gro, oplis li fé son l’éfé... apré, kour déyèr si ou i gingn, ésèy fé antann out voi, é konm la kominikasyon lé karséré par bann mantèr, lé dir pou ou fé antann la vérité. Kan ou la fine ardrèss la bar, bann mantèr la fine pran la diréksyon in n’ote mansonz.
Sa lé vré kan Virapoullé i di dann télé, la MCUR va koute troi-san milyon, alé oir lé pa vré. Alé oir lo pri sé katrovin-sink milyon. Zournalist i aporte pa la démanti. Lo kou lé parti, ziska zorèy demoun, ziska lo zyé d’moun… si ou lé pa kontan, pran konstan. Kan li di tram-trin va koute sis milyar l’ero, alé oir va koute kat foi moins, lé parèy. Arzoute èk sa son zimnatik lo kor épi son zimnatik la boush, pou anshèv roul demoun dan la farine.
Zordi ankor, partou, la manipilasyon i kontinyé : l’AGS i doi pèy l’indamnité lisansiman bann moun la travay l’ARAST, sé dann kouloir Konsèy zénéral k’i fé la grèv. Zordi demoun i koné, toute demoun i koné in pé la tir la tare déssi so l’ARAST-la, la manz la lène déssi son do, konm kréol i di : « La manz o-pyé ! ». L’èr-la, i sava rode lo boute avèk Konsèy zénéral… alé oir, bann vré résponsab la fine trouv d’ote plas pou shof la shèz, é zot i ging touzour in bon moné.
La vérité, va konète in zour, mé an atandan, konm i di… ramas mantèr, ramas mantèr, va touzour an-rèss in n’afèr !

 Justin