Oté

« Ramass in pé la shalèr pou livèr »

In kozman pou la rout

Justin / 26 mars 2020

JPEG - 43.6 ko

Médam, Mésyé, La Sosyété, koz èk moin sé koz èk in kouyon mé sé o pyé d’lo mir k’i oi lo mason. Mézami mi trouv kozman moin la mark an-o la zordi lé konm k’i diré d’aktyalité. Pou kosa mi di sa ? Pars mi santi dan l’èr konm in shanjmann sézon. Avansa la shalèr téi shal toultan, zour konm nuite, mé dopi in pé d’zour, tazantan i fé sho, aprésa i fé fré é myé k’sa kan moin la lèv la nuite moin la santi konm in gratman dann mon gorj : la prèv ni sava shanj sézon. An touléka sé sak bann gramoun i di ! Mé la pa sa solman pou sa. Zot i romark pas l’avé in bonpé zafèr téi di nou l’avé an rab, i komans manké osinonsa li la fine gaté kan ni sava débalé… Sa i di azot kékshoz sa non ? Si zot i oi pa kosa mi anparl zot lé sèl pa z’ète o kouran. An touléka mi pé dir azot néna in provèrb fransé i di : « I vo myé prévnir ké gérir ! ». Mi diré sirtou i vo myé prévnir ké pa gingn gérir. Alé ! Mi kite azot rofléshir la dsi é ni artrouv pli d’van. Sipétadyé.