Lindi apré-midi, mi rouv télé pou in foi déssi TF1. Lé vré, li lé pa otroman k’toute télé k’i pass z’ot tan pou fé la propagann la Droite, mé nana souvan-dé foi gayar z’afèr déssi la vi dmoun, dann bann vil konm dann vilaz, dann La Frans konm dann d’ote péi... épi ou i aprann inn-dé nouvèl mi trouv lé intéréssan. Na dé foi, i fé monte in pé la raz ! Akoz ? Pars la somènn l’UNESCO la mète maloya an l’èr, banna la parl in shanté polifonik la Kors, li ossi la rante dann Patrimoine mondyal. Moin lé kontan pou zot, bann Kors, mé i fo pa obli noute maloya kan mèm !
Na dé foi, lé énèrvan d’ète bordé ! Mé la pa toultan konm sa ! Pars, lindi, la pass in nouvèl moin té i atann pa : ramassaz kafé Bourbon Pointi Piton-Sinlé. Antansyon, té i aprann dé shoz la-dan… lo film té kourt, mé lété byin fé. Lété byin valab ! Demoun la parti goute kafé-la la di lé byin gouté, mèm si zot i konpran sa lé pa pou toulmoun vi k’sa lé shèr é li lé déstiné pou lésportasyon, épi konm la touzour di, sa in manyèr pou déssèrtin plantèr gonf in pé z’ot pla... Provik z’ot tèr i konvyin pou plante so kafé-la, é k’zot i nyabou réspèk in protokol in pé konpliké.
Mé sa i vé dir, La Rényon i gingn fèr dé shoz é na d’moun kalifyé pou sa... Alor, moin pèrsonèl, moin nora préfèr i bate in pé tanbour la-dsi... Pars fé kafé rodinèr, nou sar batu par bann péi déor, mé fé in kafé éspésyal, sa ni yinbou… afors tan, afors kouraz, afors fé travay la tète sirtou. Konm di l’konte, nout l’or noir lé dann noute tète... an promyé !

Justin