Matante Zélida la ékrir Justin :
Mon shèr nové, mon spès salté,
Moin lé pliské sir kan nout pti prézidan i di in bon n’afèr, zot, bann rouj de fon, zot i antann pa zamé. Zot i fé konm zorèy koshon dann marmit poi. Poitan, li sort di in kékshoz, mi pans pa in moun i pé ète kont sirtou k’i parl pou bann rish. Kossa li la di ? Alé ! Tir grinn bibas dann out zorèy in ! Li la si konmsa kant in patron i fé in bon travay, « normal li gingn in bon moné ! Mé kan li fé la kouyonad, i fo défrish ali ! ». Épi, li la di, i sava siprime bann "parachute doré" dan La France. Ou i oi ? Li vé mète la moral dann z’afèr larzan ! Astèr bouz aou !

Justin la fé aèl pou répons :
Mon vié matante, sak mi yèm avèk ou sé k’malgré out laz, ou lé kapab ankor kroi pèr-noèl, pran po d’shanm pou pla kouvèr, makaroni pou la bouji... Ou i oi pa lo prézidan lété apré koz pou fé son joli, pou sèy fé kroir li lé pli méyèr k’shokola-lo-méyèr. Li parl mète la moral dann biznès ? Bin oui, biznès nana son moral :
« Roul de moun dan la farine pou goumant son pla », fé larzan èk la transpirasion lé z’ot... Épi m’a dir aou in n’afèr : fransh vérité ! Mète la moral dann kapitalis, sé konm si ou i anparl amoin. Rann in kanibal vézétarien !

Justin