Rann manda la Lisa !

“Na pwin la plass èk nou pou sak i mèt, an promié zot lintéré pérsonèl par dovan lintéré nout péi“. Ni apèl sa inn ti pikir d’rapèl pou sak i fé lo vativyin zis pou la plas. Nout kandida na rézon kan li di sa, li di minm, pou sak i vé alé, odrémié alé tou d’suit, In manda déli lé pa in lanplwa an CDI pou li, boudikont li provyin, pou sak i fé pou “inn Rényon nouvèl“ i grat pa ti bwa. Ni koné sa nou. Néna konm sa, té éli d’si la lis Lalians an 2010 la dévir zot palto aprésa.

Alorss poukoué nout kandida la sonn la klosh d’si lo korportman inn dé ? Sak i konsidèr ké zot i dwa an awar in plas do shwa, in plas réservé vik zot lé déza éli. Minm si lo manda an késtyon i komans santi vinèg, pa pousa i donn a zot lo drwa in plas pou in manda a vi. In pé d’réspé pou lé zot mé zami ! Sirtou néna i zinn pa zot pou fout lo kan èk lo manda. Sépousa, sanm pou mwin, i sré tan rovwar tousala.

I sré tan obliz rann lo manda pou sak i bril. Sanm pou mwin aryink èk la kantité d’moun la déza trayi, si ni kont byin, néna asé pou fé in lis pou zéléksyon rézyonal, moun sint sizann, moun sin tandré, moun lo por, moun la posésyon, moun sin pol é tant dot. Aryink èk zot i gingn mont in lis. Pou mon par mi apèlré la lis “manzèr lantyi èk Esau“. Pou kosa ? Zot i koné, la bib i di “Esau la vann son drwa dénès pou in pla lantyi “ ! Avan sa “Rann manda la Lisa“ !