Biensir, i fo ni tir Sarkozy. Ni koné bien pou kosa, pars li èk son bann konplis la plonj La Rényon dann in kriz inkroiyab. Biensir, tout bann ti kolon na intéré tir Sarkozy konm prézidan. Lé vré pou La Rényon, lé vré pou bann péi l’Outre-mèr, lé vré galman pou La Frans. Pou koué i fo tir ali ? Pou sak li la fé, pou sak li koné li té i doi fé, mé li la pa fé, pars li té prézidan bann rish dépi promyé zour ziska zordi.
Mé si i tir boug-la, i fo sak i ranplas ali lé posib sé François Hollande, i konpran anou bien. Lé vré, nou lé dakor èk bann mézir sosyal. Nou lé dakor dsi la késtyonn kontra, nou lé dakor pou in bonpé z’afèr. Mi ansouvien, Elie Hoarau l’avé di lo boug té i sava dann bon sans. Solman i fo li koné nou sé in bann moun difisil pou kontanté é lé normal. Nout l’istoir lé pitaklé d’gouvèrnman la Frans la pa tyinbo parol. In l’égzanp ? La loi départman fransé la vot l’ané 1946 é la mèt sinkant-an pou bien apliké. Sha la gingn in kou d’lo sho, i méfyé ziska lo fré. Sa lé koni !
Moin la fine di sépa konbien foi, sak nou la bézoin sé lo dévlopman La Rényon. Pars nana arienk lo dévlopman i pé fé bien avans anou, é pou dévlop La Rényon, nou la bézoin in l’Éta k’i konpran bien dan kèl sityasion ni lé, é kèl mézir i fo pran. Mi rapèl Mélenchon, kan li la vni dann Port, li la di bann Rényoné i koné sak i fo fé pou zot péi, é mi pans kan li té i di sa, li té i pans Parti kominis. Ni koné vréman sak i fo fé pou mèt La Rényon dann trin dévlopman, mé bann gouvèrnman droite konm gosh ziska zordi la bash anou. Ranplas Sarkozy dakor, mé siouplé, armèt pi anou dann trin fou i koné mèm pi ousa li sava.

Justin