Mézami kosa i lé in sakrilèj ? Sa in outraj sa. Sudel la si tèlman travaye pou listoir La Rényon ; li l’avé si tan tèlman la fibr rényonèz ; li voulé si tèlman la promosyon bann rényoné ké mi konsidèr konm in outraj fé ranplas ali par in moun déor. Konm in sakrilèj.

Lo madam an késtyon, mi di ar mèm pa son nom-moin la tro pèr listoir i konfonn aèl avèk in moun in portan - vi landroi èl lé né, vi son santr d’intéré la pa la not, vi lo labsans in kordon onbilikal avèk nout péi, mi pans èl noré mèm pa du prézant in dosyé pou ranplas Sudel.. é linivèrsité si èl néna vréman bann lien avèk La Rényon, èl noré mèm pa du prann lo risk fé ranplas Sudel par in moun konmsa.

Défoi zot i koné koup par koté kan sa i plé azot.

Lé vré, an plis nou lé pou la réjyonalizasyon bann zanploi. Lé vré ni pans si néna in rényoné i yinbou okip in l’anploi kisoi gran kisoi pti, i fo done ali la priorité. Mé in moun konm Sudel avèk son rényonèzté shoviyé avèk son kor, in moun si konsyan la trète épi lésklavaz sé krime kont l’imanité, in moun la rovandik son kalité listorien La rényon, téi falé pa mète ali dann in konkirans konmsa-mèm si èl lé post mortem.

Ala lo madam mi ékrira pa lo nom i pous an prosé in bann dalon pars soidizan zot lé rasis alé oir zot la défann la mémoir nout dalon. Tribinal la anvoye ali boulé, mé fourné konm èl i lé, i étoneré pa moin si èl i sar pa in zour rant an résidiv..si na poin pou bar son shomin.

Mé an atandan, bann gro boné linivèrsité, siouplé, arète krash dsi la tonm nout dalon !