Sans prop : la pa difisil pou konprann. Bèf i rant l’abatoir antyé dsi son kat pate é kan li sort li lé an pyès bon pou alé dann komèrs. Astèr si ni vé parl sans figiré, ni parl pi d’bèf, ni parl pi d’biftèk, nou l’apré parl sinploman dsi lo manyèr pou prann lé shoz, pou trouv solisyon pou in problèm. Par la fors sansa par la riz, par la fors sansa par l’adrèss. Si ou i manyé la fors, é si mi kroi nout kozman an-o la, ou i pran lo risk pèrd la parti. Si ou i pran par la riz, sansa par l’adrèss, épi si mi kroi kozman nou la mark an-o la, na plis la shans pou gagné… Zot i koné néna in éspor i apèl jido é bin l’éspor la i aprann ansèrv lo fors l’advèrsèr pou gagné plito k’ansèrv out prop fors. Alé ! Mi lèss azot rofléshi la dsi é ni artrouv pli d’van sipétadyé.