Mi rapèl in n’afèr la spassé kan moin lété jenn. Mi rapèl bien rant ki sa l’arivé mé mi dira pa, mi rapèl koman sa la éspassé é sa mi panss mi pé rakonté : in bataye fanm dann mon kartyé. Dann tan l’avé poin dolo dan la kaz, toulmoun téi sava la fontène pou rode dolo é sé konm sa k’in madam-ni pé apèl madam X la bite dsi in madam ni pé apèl Y. X té bonpé an kolèr kont Y, mé y lété pa ankolèr ditou é èl téi koné pa pou kossa X té anvé d’èl. Anvé d’èl ziska rode bataye avèk èl dann shomin : X téi koné sak demoun téi di : « flank kou d’poin, koud’pyé, kou d’tète toussa avèk fèrblan sou lo bra é an mèm tan. Rézilta, X la tonm atèr dann shomin é y lété solman étoné k’in n’afèr konmsa i ariv, mé X la kolèr té pankor fané lé di : « Ma fiy, kan mwin néna in n’afèr pou dir, mi anvoye pa dir, mi vien moin-mèm ». Apré shakinn la trap son fèrblan éla parti son koté pou rode son lo : in bon lilistrasyon pou lo kozman : rant an bèf, sort an biftèk. Alé ! Mi kite azot rofléshi la dsi é ni artrouv pli d’van. Sipétadyé.