Mésyé, Médam, La Sosyété koz èk moin sé koz èk in kouyon-mé sé o pyé d’lo mir k’i oi lo mason. Kan ou I rant an bèf sa I vé dir ou I rant an brital mé la britalité i apèl la britalité donk si ou i azi an brital ou néna dé shans i rann aou parèye. I di pa sak i tyé par lo fé, va mor par dofé, sak I tyé par zépé I mor par lépé ébin lo késtyonn britalité, sa lé parèye. Ou azi par britalité mé l’moun I rann aou la parèye. Antouléka sé sak moin la touzour vi fèr. La pa lo pli intélizan k’I amen la bark dann in n’afèr konmsa mé lo pli limité, lo pli brital, sak néna lo moins léstratézi. In késtyon mi poz amoin touzour : si ou néna in zènmi lokèl ou I préfèr, in l’ènmi kouyon sansa in l’ènmi intélizan ? Si moin l’avé lo shoi, moin noré profèr in l’ènmi intélizan pars kont in moun intélizan ou I pé fé valoir out zargiman. La pa kont in kouyon pars I diskite pa avèk in kouyon, I donn ali rézon. Alé ! Mi kite azot rofléshi la dsi é ni artrouv pli d’van. Spétadyé !