Si mi tronp pa, dan l’ané 2009, lo tram-trin, sa lété in prozé popilèr : in bon mazorité d’moun té i vé oir fé so tram-trin la. Mank de shans, la bétiz la ranport la viktoir dsi l’intélizans, la foli dsi lo rézonab, é la mazorité UMP la désid arèt fé ali. Bann sosyalis la mod Vergoz la bat la min... Zordi, sanm pou moin, in bonpé Rényoné la fine ronons prozé-la, pars zot la fine pèrd kouraz é zot i pans sa in n’afèr i fèr ar pa zamé.

Poitan, la pa partou lé konmsa. Dan la France, dan bann gran vil konm dan bann vil in pé pli pti, i arfé lo trin, lo tram, sansa lo tram-trin. I pas pa d’péryod san k’i anons la rouvèrtir in lign. Na poin lontan, la fé in lign sinkant dé kilomèt la-ba Nantes, lo vil Jean-Marc Ayrault, Promyé minis zordi, lété lo mèr. Dan bann vil konm Nice, Bordeaux, Lille, Montpellier, koméla nana lo tram-trin. Montpellier, koméla nana troi lign, é konm demoun i pran lo trin plizanplis, la ranbours l’arzan anprété in vitès inkroiyab. Sa i vé dir, isi osi, nou noré nyabou pèy nout krédi.

Pétèt zot i pans lo tram-trin la, sa lé rézèrvé bann péi nana la moné an gran kantité. Pétèt zot i mazine sa té pa in bon n’afèr pou nou La Rényon, é té riskab mèt anou o-flan. Figuir azot, mi sort lir in l’artik dann in zournal morisien k’i anons i sava fé in métro lézé rant Curepipe épi Port-Louis. I di mèm lé shoz la fine bien avansé é va done promyé kou d’pyosh la finn l’ané 2013. I di mèm sar in trin dsi piloti pou pa tro dépans l’arzan pou ashté la tèr, épi pou pa tro gaspiyé.

L’imazinasyon o pouvoir dan l’il Maurice, mé pa isi !

Justin