Moin la fini anparl azot inn an parmi mon bann dalon. Mi sava pa site son nom, mé sak i koné in pé lo milyé l’inivèrsité mi pans i koné ali. Li la gingn l’okazyon dann lo pasé dir amoin dé shoz pou moin lé inportan. Par ébzanp li la di amoin, isi ba dsi la tèr, shakinn nan son talan, osinonsa son bann talan. Sa i rapèl pa zot bann noir d’talan ? Bann moun, dann tan l’ésklavaz, l’avé in bon métyé dan la min konm tayèr, maréshal féran, bardotyé épi d’ot ankor.

Zordi, isi La Rényon, nana in kantité d’moun nana z’ot talan. Lé bien vré ! Mèm si l’administrasyon i rokoné pa sa ! Mèm si la vi la mète azot dann shomaj ! Mèm si zot lé andikapé. Andikapé ? Oui biensir andikapé d’la vi, mé andikapé kolonyal osi. Zot lé pa rokoni dann nout sosyété pou z’ot mérite, souvan dé foi, pars z’ot nonbri lé antéré isi… Pli pir ké sa, lo bann moun, mèm sak lo nonbri lé antéré isi é si lo pouvoir kolonyal i rokoné in pti pé z’ot mérit méziré èk lo mète kolonyal, sa i anpèsh pa zot karz z’ot konpatriyot.

Pou kosa mi di sa ? Pars d’isi d’laba mi antann inn lé dann plakar, l’ot lé dann plakar, l’ot ankor épi l’ot galman. L’èr-la, sèl z’afèr mi pé dir azot i fo zot i rant dann la rézistans, pars rant dan la rézistans sé rant dan la dans. Fénoir i pé pa ète lo pli for toultan !