Rant dë kékshoz sé lo moin solid i krak avan. In légzanp : po d’tèr kont po d’fèr kisa k’i kass si la pa lo po d’tèr ? Kan in zèf i dans avèk in galé, mi pé prédi ali in mové déstin. Donk, ni konpran bien sé lo pli tann i doi sède avan. Fransh vérité ! Rant lo dan épi la lang lékèl lé pli dir ? Mord out lang ou va oir. La pa lo dan va soufèr, mé sirman la lang é zot i koné in mordaz de lang la pa gayar toulbon. Donk lo dan sé lo pli dir ! Donk sé la lang i doi sède avan ! Sa la pa vré pars moin la konète demoun san dan dsi zot vyé zour mèm avan mé d’moun san lang sa moin la zamé vi. Alor, mèm si la lang lé pli tann, li lé pli dir-mi vé dir li lé pli rézistan. Alé ! Mi oi pa tro kosa i ansèrv sak moin la ékrir dopi talèr-la, mé i pé fé rofléshi azot é ni artrouv pli d’van. Sipétadyé.