Dann in péi normal, kan ou i rod in plas travay, ou na plizièr solision. An gro, soi ou i rod travay dan l’administrasion, soi ou i rod travay dan lo privé, suivan out diplom, suivan out kapasité galman, suivan sak i apèl l’of travay. Dann in péi nana si tèlman in bonpé shomaj konm La Rénion, ou pé fé konm sa galman. Mé travay lé rar konm korn lapin, é bann moun i rod travay nana an kantité.

L’èr-la, gouvèrnman lé dan l’obligasion done in solision pou ranplasé : in éstaj profésionèl, sansa in pti kontra, sansa ankor in l’alokasion k’i mèt aou d’sou pa d’port la mizèr. Sé pou rézon nana touzour in batay dsi bann kontra édé. Toulmoun i koné sa i amèn pa ou bien loin : inn, lé mal péyé, dé, lé tan parsièl, troi, na in komansman, mé na osi in finision. Lo kontra ou i gingn zordi i mèt aou dann traka domin kan lo finision i ariv.

Moin la antann, somèn dèrnièr, demoun Sint-André té i vé roganiz in manifèstasion pou ankouraj pa pran bann ti kontra sis moi. Mi koné pa si la fé, si la pa fé manifestasion. Mi koné pa si in bonpé d’moun la parti manifèsté, mé sak moin lé sir, sé ké zordi, na plis demoun i réklam lo kontra ké demoun paré pou rofiz azot. Sa sé in késtion, é ziska zordi, mi koné pa kisa i pé trouv in bon solision. Pars si ou i di, na in sèl solision valab, sé dévlop lo péi épi trouv travay pou l’moun, é si pèrsone i oi pa in vré politik dévlopman an marsh, l’èr-la, kosa l’moun va fèr ?

Na in dalon la di amoin konm sa : Majine in kou in moun apré noiyé. Ou i di ali, shoizi rant in liv pou aprann bien najé épi in boué sovtaz. Kèl rant lé dé li va pran ? Moin lé plis ké sir, lo moun va shoizi lo boué ! 

NB : Aprésa li la lès amoin pèrdi dan mon réfléksion.

Justin