Médam zé mésyé, la sosyété koz èk moin sé koz èk in kouyon, mé sé o pyé d’lo mir k’i oi lo vré mason. Zordi konm souvan dé foi nou lé dann l’afrik an provèrb : zordi dann éi i apèl Sénégal é kozman moin la mark an-o la, pou konprann ali, i fo ou lé dizon in bonpé filozof dann sans ou i pran la vi konm k’i vien. Ou i yèm in moun li yèm aou, bon pou sa mèm, mé ou i yèm ali é li yèm pa ou, i doizète galman bon pou sa mèm. Dizon sé konmsi sé lo déstin : santiman rant dé moun, sa sé in n’afèr ou i komann pa. Apiye dsi in bouton, sa i marsh pa é konm sa i marsh pa la pa bézoin pran la kolèr, la pa bézoin kasé brizé. A ! Si toulmoun téi pran la vi konmsa noré pa bézoin i ariv, dipite, bataye, krime..é poitan an zénéral, sa la pa konmsa é lo kozman lo saz afrikin li pé amenn anou dann in shomin san zépine. Alé ! Poitan, mi diré sa sé lo méyèr prèv l’amour ni pé doné. Alé ! Mi kite azot rofléshi la dsi é ni artrouv pli d’van. Sipétadyé.