Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, sé konmsa ké zot i vé anpèsh mésyé Didier fé son travay ! I rod blok ali dsi la késtyonn rosh ! I pans konmsa va anpèsh fé la nouvèl rout litoral ! Détronp azot pars mésyé Didier la vi lo kou vnir dopi loin. Té tro téléfoné z’ot afèr ! Si tèlman ké li la di dmoun komann bann rosh Madégaskar. Si tèlman ké li la fine domann mésyé Préfé pou aroir la kart bann karyèr. Mi mète mon min a koupé si son plan marsh pa . Son plan va marshé é in pé va konstat z’ot ane sé inn bourik. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, moin nana solman dé-troi shoz pou dir aou :

Promyèrman : si i fé vnir konm la di bann rosh dopi Madégaskar – mèm si i di va fé vnir solman 250000 tone é moin lé sir sa lé mantèr – nou va fé vnir la maladi konm la pèst, la raj, la bilaryoz épi d’ot maladi bien anbétan konmsa. Aprésa, koman va fé pou tir sa d’isi ? Lo répons lé pa sinp..pa konm dé plis dé i fé kat.

Dézyèmman : si i désid transport disnèf milyon kamyon galé dann l’ouès, donk si i roganiz in balé plizyèr santène kamyon, tou lé zour, pandan plizyèr z’ané, fransh vérité la vi sar pa posib pou in takonn moun Sar tèlman infèrnal ké na in dmoun va tonm malad avèk l’asm, maladi d’poumon, mal do tète é mal z’orèy avèk an plis in éstrès san fin. I pé mèm pansé ké inpé la tète va bloké.

Troizyèmman : Astèr si ni rogard lo plan Vergès pou fé lo trin épi la rout nou n’oré pa gingn tout so bann l’inkonvényan la, é pou finir nou noré gingn dé z’afèr pou moins ké lo pri d’inn. L’èrla nou va di lété lo plan la rézon é sète l’éfikasité. Alé oir sète didier sé la dérézon é lo paralizi. Rant rézonab épi rézodyab i fo konète shoizir.