La pa arienk zordi bann rotrété i souplègn dési la date lo pèyman zot rotrète. Alé konprann pou kosa, mé pou bann gramoun, lo moi i fini lo dis, défoi lo douz, moi suivan... sa pou gingn zot larzan salaryé. Pars pou lo rès z’afèr konm loiyé, dolo, léstrésité, lo moi i fini lo trant. Sé dir azot si banna i komans gingn la tranblad kan lo sink lo moi i ariv, pars sak zot lé sir, zot i komans gingn papyé pou dir azot zot lé an rotar dési zot bann pèyman. An pliské sa, tansyon mazorasyon, tansyon bann z’azyo, tansyon ankor bann fré la bank.

Na lontan demoun i koné sa. Na lontan bann rotrété i domann k’i fé in jès pou zot. Sirtou ké la plipar rant zot nana fay rotrète. Na poin tro lontan, Konsèy zénéral la déside vote in bidzé pou sa, konmsa la grann kèss na poin lo fré anplis pou siporté. Mé alé savoir pou kosa la grann kèss la réponn sa lé pa posib pars i fo atann in désizyon lo gouvèrnman ; Bann rotrété la manifèsté Sin-Dni, mé sa la pa avans de riyin sof pou amontr demoun lé pa kontan.

Madam Bello, député, la poz in késtyon lo minis Xavier Bertrand. Sète-la la di, li lé dakor dési lo prinsip é dési lo l’aplikasyon. Bon nouvèl ! Solman, kan nou ni konpran i sava fé sa tout-suit pou tout-suit, kan in pé la ziska antann sa té i komans promyé zilyète, lo minis i di va fé sa dann kèkmoi. Va fé, i fèr arpa ? A Pak sansa la mi-Karèm ? Pandan éstan-la, konm di Kréol, kabri i manz salad.

Justin