Oté

« Rante an bèf, sorte an biftèk 

In kozman pou la route

Justin / 26 mars 2021

JPEG - 43.6 ko

Médam, zé méssyé, la sosyété, mi pans zot i koné déza kozman-la pars li égzis é demoun i ansèrv ali dopi bèl az é bo tan, é kréol i ansèrv sa souvan dé foi dann la konvèrsasion. Konbien foi mwin la antand dir déssèrtin moun lé désidé pou fé pète la kol mé si li lé désidé par li mèm i ariv li la obliye l’advèrsité. Souvan i antann dir : « Ou lé bon, ou lé bon pou ou ! Ou lé for, ou lé for pou ou ! ». Sa i vé dir ladvèrsère néna lo répondan é kan wi kroi wi sar fé in konba vinkèr, sé l’èr ou lé batu san konprann sak i ariv aou. Kozman-la néna in pé dann toute liv la lang kréol é shakinn i done son linterprétasyon. Dann somi-lo mo Daniel honoré i di : « Si wi rant an bèf mové, ou lé riskab sort an biftèk ségnan » é pou li sa i vé dir si wi azi an brital ou lé riskab siporte lo konsékans. Alé ! mi kite azot rofléshi la dsi é ni artrouv pli d’van. Sipétadyé.