Nelson Mandéla l’avé rèv libère son pèp konte l’apartheid. Louis Pasteur l’avé rèv invante lo vaccin pou soign son bande kontanporin. Avann invante l’avion konbien bande demoune la révé. Révé galman pou la konkète léspass. Rèvé pou la libérassyon d’ in sèrtin Martin Luther King : li téi di pa : « Mwin la fé in rève. ». La télé i parl lo zénéral Bolivar sète la rèv libère l’Amérik di Sid par raporte toute la bande dominassion… Mézami, toute bande zavantir limanité la komanss par lo rèv.

Mé in rév toussèl dann son koin i ansèrv de rien. Pou k’in rève i réalize i fo i lé partajé : konbien d’moune la rève avèk Ferdinad de Lesseps kan li la krèze lo kanal de Suez. Konbien la rèv avèk Mao dann la grande marsh. Konbien d’moune la rève avèk bande révolisyonèr pou fé tonbe lo lansien réjime. Konbien la rèv avèk Ho Chi Minh pou libère lo Vietnam. Rèv partajé, rève rante demoune pou pouss pli loin l’avantir umène.

Mézami, Médame, Méssyé, La sosyété, zot k’i vé travaye pou zot péi, fé sorte ali dann fénoir pou mète ali dann la limière, zot k’i rèv lo dévlopman épi lo réspé l’anvironeman, zot néna rézon, san foi, mil foi rézon. Mé zot néna ankor pliss rézon si zot i nyabou fé rève demoune an mèm tan k’zot, pou lo mèm projé ké zot, épi son réalizassion. Sé sa la klé pou bande viktoir.

Konm déssèrtin i di : Rante lo rève épi la réalité, néna laksyon… Kékshoz a pa obliyé.