Pars i pé di la lite bande shagossien épi la lite lo pèp rényoné lé pa parèye. Ni koné bande shagossien avèk zot group rézistan i vanj pou gingn lo droi rotourn dann zot péi d’néssans, aranz zot vi konm zot la révé dopi lo promyé zour zot lété déporté ziska zordi é sirman zot i doi kontinyé révé an atandan listoir i donn azot lokazyon viv zot rèv an vré.

Pou nou La Rényon, ni vé, ni vé pa, ni amenn in lite libérassyon galman. Mi rapèl sak Lulu in kamarade portoi téi di, é kossa li vé dir kan téi antande ali apré di : « Kissa i gouvèrn nout péi ? ». Ni pé réponde san tronpé : d’apré mwin la pa nou. Antanssyon mézami sa lé vré in pé partou oussa lo péi i soufèr in dominassyon é si sa lé vré pou nou, lé vré galman pou bande shagossien, pou bande palestinien épi in kantité péi, in kantité pèp dan lo monde.

Kissa k’i diré bande shagossien i amenn pa in rézistanss ? Kissa k’i diré bande rényoné zot ossi d’inn sèrtènn fasson i amenn pa zot rézistanss ? Donk sa i raprosh anou lé z’inn avèk lé zot. Bande shagossien ni koné azot dopi in bon koupe de tan é mi doi dir nou néna ladmirassion pou zot é sirtou pou zot manyèr amenn in politik d’inyon. Zot néna zalyé partou : kissoi dann parlman britanik, kissoi dann l’afrik, kissoi la Rényon bien antandi, kissoi in pé dann toute péi.

Mézami rézistan rényoné, zot i panss pa nou ossi i mank anou zami, zalyé, pou ranfors anou épi afébli noute zadvèrsèr. Astèr lèss amwin dir azot sak inn kamarade la di avèk olivier dann in rényon : èl la di, olivier wi di anou toultan mèrssi pou la solidarié bande rényoné, ébin mi doi dir aou sé nou k’i doi romèrssyé aou, pou toute sak nou l’aprande avèk zot. Toussa léspèryanss nou la v iv avèk ou épi bnde shagossien.

Mézami kozman-la i réponde késtyon mwin la poz an komanssan. Lé vré ni koné pa konbien tan bande shagossien va lite ankor pou toush zot bute, mé sak nou lé sir sé ké zot lé dann in bon trazéktoir é sa sé kékshoz i doi done anou zidé pou avanssé. Dann konbien d’tan nou va trape noute bute libérassyon ? Ni koné pa non pli ; mé noi koné si nou la bien trass noute trazéktoir nou pé pou trape nout bu nou ossi.

A bon ékoutèr, salu.