Néna kék tan, moin la pa gingn lo plézir admir in vré rasanblaz zoizo dann piédboi, lo soir sizèr bondié, kan zot i larg zot prièr. Na poin aryin, na poin konsèr pli gayar, pli zoli k’sa.

Mi arvir la dsi akoz ? Pars na poin tro lontan, par koté lo grot Sinpol, bon pé d’moun té témoin in fénomèn in pé parey, landroi piknik. Sof ké so kou la, té pa zoizo bondié té dann piédboi, mé in troupo lo ra, té pou zoué lou casièt dann branshaz ! Domoun kèr féb, té kab gingn sézisman. Mé anplis késa, lé dégoutan mé sirtou danzéré.

Lo mimm sominn, in pov plantèr dé-o, té pou arkont son maléré sor dann radio. Li té explik koman li lé anpésté ék festin lo ra dann son bitasion. Li koné pi kosa i fo fé. Poizon granilé zot i vé pi manzé. Zot palé lé fin !

Ladsi, mon kamarad gran konésèr i di a moin : lo ra zordi lé pi kouyon. Zot lintélizans i frol bak +5. Dayèr, koméla lo ra i viv pi sélman dann karo shousou ou karo patat’, dann plantasion mélon ou sinonsa ankor dann bidonvil kaz do boi. Koméla an parmi zot, néna bonpé lé sitadin, i viv an vil dann zimèb. Ziméb név siouplé ! Kan fénoir i rant, zot i shap, i sar bat’ karé dan lékol, i rant dan la class, i rouvèr liv marmay. Tard pa zot va ékri d’si tablo ! Sominn pasé, zot té lékol Bolié-SinBénoi. In pé avan té Bra-Panon. Lo ra koméla lé fronté, i annarg a nou.

So ti grin dironi an lèr, sé pa pou fé ri la boush, mé sé pou armont’ lo gravité d’la sitiasion. Plis 42 ka léstospiroz dopi débi d’lané, inn an parmi la désot la vi. Mon linkiétid, apar inndé ti romark dann télé, kan i ariv in manifestasion bann ra, la poin gran soz i éspas.

Atann pa, siouplé, lo ra i ral anou d’si lo li, pou bouzé, pou mont’ ali, la pa li i komann.