Mi pans aou mon vié nénèn, mi pans aou toultan, épi mi dmann amoin si dann landroi ou i lé, ou na le tan pou okip in pé sak la pankor, konm ou, travèrsé pou alé dann roiyom la mortalité. Dann tan mi di aou la, la loi départman fransé lavé fine ète voté, solman lasansèr sosial té i mont pa mèm vitèss pou toulmoun.
Pou déssèrtin, li té i sava vite, li té sava o. Pou déssèrtin, li té marsh o ralanti, li té i mont pa vite, li té i mont pa o. Moin, pou mon par, moin té i domann amoin toultan pou kossa a lété konmsa.

Mi koné ou la gingn in takon zanfan épi in takon pti zanfan, mèm in bon pé arièr, sansa arièr-arièr. In pé lété klèr. Konm di lo kont, zot lavé la koulèr. In pé lété fonsé a-mor... kan bondié la di vien pran la koulèr, zot té apré zoué la krosh dan la savane péi bondié... épi zot la pa antann sa... i paré, mé sa moin lé pa sir, sak la gingn la koulèr, lasansèr sosial té i amènn azot pli o, pou rézon zot léspri té pli rouvèr. Sa i di, mé mi koné pa si lé vré pou vréman.

In pé dan out désandans la bien pran lasansèr, in pé la mal pran ali. In pé la monté dan la sosiété, in pé la kal an ba... Demoun té i di an parlan d’sak la pa gingn la koulèr : « Sé d’noir, mé sé d’bon moun ! ». Pou lé zot, sak la gingn la koulèr, lavé poin arien pou dir pars lasansèr-la la amènn azot bien o, donk la pa bézoin kritik azot.

Alor, mon vié nénèn, ou k’i doi oir toussa la dépi landroi ou i lé, ou i pé dir amoin si sak mi di sé in vérité, sansa in domi-vérité, sinonsa lé pa vré ditou. La réissite demoun suivan la koulèr, pétète sa lé pa possib, pétète sa lé possib. Alor, pou kossa ? Pars sak na in pé le pouvoir i pans lintélizans i marsh avèk la koulèr ? Si sé oui, alor zot lé rasis, mé rasis-la, sa na pi sa zordi, vik lé défandi.

Justin