Mézami la pa promyé foi in n’afèr konmsa i ariv kissoi dann l’Espagn, kissoi dann l’Italie, mèm kissoi dan La franss — mèm si lé in pé pli rar dann La franss… antouléka néna toute in kanpagn médyatik kont lo rassism mé lo rézilta ziska zordi lé plito mèg. Mi panss inn foi inn-dé spéktatèr lé plin avèk la rake ébin zot fon rassist i lèv é zot lé paré pou insulte demoune.

Momandoné ofisyèlman la di i fo sankssyoné mèm arète lo match si bann zakt rassist i kontinyé. Mé lé pa si fassil ké sa, d’trouv in sankssyon éfikass épi adapté avèk lo ka… Mé lo rassism, sa lé pini par la loi, mé i antan pa si l’aplike la loi sansa si la pa apliké. Si i aplike dan la vi toulézour akoz pa dsi in térin léspor. Pars sé in zone interdite ?

I prétan banna la trouv sak la pouss bann kri rassist é lo boug sré interdi rante dann in stade toute sa vi. Nou va oir si i fé… Solman néna in sityssion lé dovan nou laba dann l’érope. Kossa i lé ?

Bann mouvman la droite rassist firamézir i pran lo pouvoir. Sé lo ka dann l’Italie, pétète biento dan La franss. Alor, i fo konte dsi bann parti rassist biento o pouvoir pou aplike in loi anti-rassist ? Sa mi kroi pa pars talèr zot va trouv lé pa in akt rassist mé in manyèr pou déstabiliz lo zouèr.

Sa lé asuiv sa, pars lé sir ké sa sé in n’afèr intolérab. Antouléka demoune normal i panss konmsa. A bon antandèr, salu !

Justin