Mézami néna dé mo k’i sava é k’i vien, kan wi panss zot la fine aléa la zot i ro aparète.

Lo mo « ravaz »sansa « ravaj » mwin néna linpréssyon lé konmsa. Kan mwin lété jenn mwin téi konsidère ali, déza, konm in vyé mo, é ki di vyé mo, di kondané pou disparète. Mé li la pa disparète ditou, an kontrèr ! Li la ropran favèr. Dann radio, dann télé, dann kozman d’moune wi antan i parl ravaz. Mé kossa sa i lé pou vréman ?

Pou in pé sé bande rassine lontan téi fé kui pou zanimo, é bande marmaye téi sava rode sa pou manzé san di zot paran donk téi di zot i ravaz-é sak zot téi trape pou manzé téi apèl lo ravaz. Mé mwin lé pa sir k’sé sa pou vréman, pars tazantan li apèl pi ravaz mé li apèl konblaz : in bone platré, é lo vante lé plin, la fain apézé. An touléka, sou son nom « ravaz » sansa sou son nom « konblaz » li lé assiré kontinyé son parkour trankilman-si tèlan li kol avèk laktyalité lo manjaye.

Alé ! Mi kite azot rofléshi la dsi é ni rotrouv pli d’van. Sipétadyé.