Dann ministèr lédikasion nasional, nana dmoun lé péyé pou kalkilé. Kalkilé, mi pans, pou rann lédikasion nasional méyèr pou bann zanfan, pou èd azot, sirtou sak i aprann pa bien, an avoir in bon parkour lékol, konmsa zot ossi, zot va niabou aprann in bon métié, pou gingn z’ot soso bien konm k’i fo.

Sé pou sa, dann bann kolèz, la trouv in solission, an parmi d’ot, pou ède bann marmay. La di va fé bann klass kontra, va mète bann amontrèr éksopré pou okip dé sa. Tanzantan, va fé lo bilan pou konète si lo sistèm lé bien bon, sansa si i fo aranz ali in pé.

Mi sort gingn in mésaz, in dalone i okip dé sa zistoman, bien sir avèk son kouraz, épi sa bone volonté. Èl i di konm sa : « Lo réktèr lakadémi La Rénion la désid arète avèk sa : nora pi bann klas kontra. Shak kolèz va fé in pé konm li vé ». Alor, soi sé in mové zafèr, épi pou konète i fo di lo bilan ! Si i fé sa arienk pou raz la pinte. Alé, razé mèm ! I raz pa gratuit sa ! In zour, sa i pèy.

Justin