Matante Zélida la ékrir Justin :
Mon shèr nové, mi éspèr ou lé pa bien ditou. Akoz ? Pars kan gouvèrnman i fé in n’afèr d’bien, ou nana toultan in rotour d’bil ! Ou l’apré kritiké solman ! Lé vré, lé pa vré ? Parské zistoman, gouvèrnman i sort fé in n’afèr éstra : goumant lokasion rantré éskolèr. Ou i rann aou kont koman sa i sava aranz la sitiasion bann famiy ? Épi, konm ou i di ou mèm, sinkant milion l’éro, sa i trouv pa sou la pate shoval !
Alé, rovoir spès malfondé ! Obli pa na inn i rogard aou la-o !

Justin la réponn :
Mon vié matante, si li rogard amoin, moin lé kontan. Sa i vé dir li vèy si moin, li protèz amoin in pé. Mèrsi pou vot bone pansé ! Solman, konm di bann vié moun, ou i konfonn touzour “otour avèk alantour”, akoz si ou i gard in pé pli loin k’lo bout out né, ou va oir : gouvèrnman la siprime goumantasion pou marmay onz an. Bann famiy la pèrd dé san sinkant milion l’éro. Zordi li rann sinkant milion donk, bou-di-kont, bann famiy la pèrd dé san milion ! La pa in pti katsou, sa ! Sa i sort pa sou la pate shoval !

Vou-mèm, kan vi ashté in pinte piman. Si lo vandèr i vann aou in pinte lé pa an bite, kossa ou i di ? Ou i di sé in razèr d’pinte. Kossa gouvèrnman i fé sansa raz la pinte bann ti-kolon pou gonf lo pla bann rish ? Fransh vérité !

 Justin